Zug – I de Pause isch de Leerer Schönebärger öppe zu sine Byli go luege. Er isch e begäischterete Imker gsy. S Bylihüüsli isch näbem Brunnebach grad ob de Artherstrooss gschtande. D Chind händ bim Wächsle vo de Waabe amigs töffe zueluege und de Hung use schläcke. Noch de Schuel händ d Buebe müesse bi de vile Bylihüüsli rund ums Dorf go hälfe.

Völkerball isch s liebschte Ballspyl gsy vo de Oberwiler Chind. Die vile Gischpel händ aber nume äi äinzige Ball ghaa und dee hed nümme vil Luft dinne ghaa. D Chind händ drum bim Leerer gjommeret. Dee hed gsäid: «Mir händ käi Gäld für e nüüe Ball z chaufe!» D Chind händ gmööget daas sig ugrächt! Alli Klasse z Zug unde häigid en äigne schööne Ball. De Schönebärger hed de Chind en Root ggää: «Gönd uf Zug abe und sägid daas im Stapi Lusser, dee hed d Schuele under sych».

Am nöchschte Mittwoch Nomittag isch e Tschupelete Mäitschi und Buebe als Delegation vo Oberwil uf Zug abe gloffe. Bim Casino sinds ufe zum Pulverturm, deet im Roosehof hed de Stapi gwont. Si händ es bizzeli Reschpäkt ghaa vo dem hööche Maa. Es isch lang ggange bis äine vo dene Bängel truuet hed a de Glogge z zie. Äntli hed es muetigs Mäitli a dere Glogge zoge.

De Stapi Lusser isch use choo und hed gfrooget was si vom Schuelpräsident wüüsch­id? D Chind händ ires Aalige vorträid und händ au gsäid, as d Zuger Chind schööni Bäll häigid. De Stapi hed die Ugrächtigkäit gsee und hed de Chind gsäid si söllid bim Laade a de Nüügass e Ball go chroome. D Rächnig für dee Ball sölids is Stadthuus bringe.

Die chlyne Bängel händ nomol alle Muet zäme gnoo und gsäid z Oberwil häigs dry Klasse und drum bruuchid si dry Bäll. De Lusser hed gschmunzlet und hed dry Bäll bewilliget. Die muetige Oberwilerchind sind scho bald mit de nüüe Bäll z Oberwil aachoo. Die ganz Schuel hed si wie «Helde» gfyret. S Völkerballspyl isch vo doo a wider es grosses Vergnüege gsy. Au de Leerer Schönebärger hed a de «Stapi-Mission» vo sine Chind Fraüd ghaa und hed hinder sym Schnäuzli echli ggigelet.

Sozialarbet vo de Schuel uus

De Leerer Schönebärger hed de Chind «bifole» im Dorf d Auge uufzmache und z hälfe. So händ si müesse für elteri Lüüt, wo s Huus nümme händ chönne verloo, go ychaufe. Zwee alti Manne, wo bim Tällenörtli am See ghuuset händ, händ nümme chönne laufe. Die zwee händ hy und da müesse go poschte und gwüssi Gschäft go erledige. Churzerhand händ zwee Buebe bim Tällemattpuur e groose Läiterwaage gholt und händ die Behinderte uf de Waage glüpft und scho sinds mit ine zum Kuafför, uf Poscht und go Kumissioone mache. D Chind händ bim Hälfe au in Hushalt vo dene zwee Manne gsee. Deet inne sig es Durenand gsy. D Hüener sigid im ganze Huus ume gflatteret und es häig gruusig gschtunke.

Uf de Nordsyte vom Huus hed en alti Frau gwont, au für die sind d Chind go poschte. Als chlyne Loon händs deet amigs fäins Chüttene-Gebäck überchoo. Mhh, sig das läcker gsy. So händ d Schuelchind vom Leerer Schönebärger scho i de Schuel gleert sich sozial yzetze.

Schuel gää au no im Rueschtand

De Leerer Schönebärger isch 1952 i Pension choo. Sit 1948 gids d AHV. Au är hed e chlyni Ränte vo öppe 100 Fränkli überchoo. Will är mit sinere groosse Familie nid vil hed chönne spaare, hed är no gäge zää Joor äister Stellverträttige i allne Schuelhüüser übernoo. Är hed demit no e chlyne Zueschuss zu sinere Ränte überchoo. Oni z gruje isch är i d Klasse ggange und hed mit de Chinde gsunge und mit de Fidle d Lieder bigläitet. Au über d Byli hed är chönne prichte. Es isch e Fröid gsy.

Settigi Original gids hüt fascht nümme. Wie würd au im Schönebärger sys Schuelgää i nüü Leerplan 21 passe? Es isch halt hütt en anderi Zyt! Öb die besser isch?

Hinweis

Die Mundartecke erscheint einmal im Monat und enthält Geschichten und Erinnerungen aus der Stadt Zug. Wer Schwierigkeiten beim Lesen hat, soll es mit Lautlesen versuchen.